John Locke

Dr John Locke [dʒɒn lɒk] (* 29. August 1632 z Wrington bi Bristol; † 28. Oktober 1704 z Oates, Epping Forest, Essex) isch en iiflussriiche änglische Filosoof und Vordängger vo dr Ufkläärig gsi.

Dr Locke gältet allgemäin as dr Vater vom Liberalismus.^[1][2][3] Er isch zämme mit em Isaac Newton und em David Hume dr Hauptverdräter vom britische Empirismus. Näben em Thomas Hobbes (1588–1679) und em Jean-Jacques Rousseau (1712–1778) isch er au äine vo de bedütendste Verdraagstheoretiker in dr früeje Faase vom Zitalter vo dr Ufkläärig.

Si politischi Filosofii het d Unabhängikäiserkläärig vo de Veräinigte Staate beiiflusst, iiri Verfassig und au d Verfassig vom revoluzionääre Frankriich und über dä Wääg in groossem Maass die mäiste Verfassige vo liberale Staate. In sim Wärk Two Treatises of Government argumentiert dr Locke, ass e Regierig nume denn legitim isch, wenn si d Zuestimmig vo de Regierte het und d Naturrächt Lääbe, Freihäit und Äigedum duet beschütze. Wenn die Bedingige nit erfüllt si, häi d Underdaane e Rächt uf Widerstand gege die Regierende.

1. ↑ Locke, John. A Letter Concerning Toleration Routledge, New York, 1991. p. 5 (Introduction)
2. ↑ Delaney, Tim. The march of unreason: science, democracy, and the new fundamentalism Oxford University Press, New York, 2005. p. 18
3. ↑ Godwin, Kenneth et al. School choice tradeoffs: liberty, equity, and diversity University of Texas Press, Austin, 2002. p. 12